Suður-Ameríka er heimsálfa þar sem fjölbreytileiki ræður ríkjum og borgin Lima er frábær staður til að upplifa suður-ameríska borgarstemningu. Þar er stutt öfganna á milli því í borginni finnast bæði glæsileg viðskiptahverfi og fátækrahverfi. Háhýsi og snyrtilegar göngugötur sem liggja meðfram hafinu minna á lífið við Miðjarðarhafið. Dvöl í Lima veitir ferðamönnum tækifæri til að slaka á við sjávarborðið ásamt því að fá innsýn í sögu Perú.
Þrátt fyrir að borgin sé hulin þoku stóran part af árinu er Lima vel þess virði að heimsækja. Hitastigið breytist lítið milli árstíða og því er borgin frábær til þess að kynnast sögu Perú ásamt því að slaka á við sjávarsíðuna. Lima er auk þess góður staður til þess að hefja spennandi ferðalag um Perú.
Upplifðu sögu og menningu Perú
Í Lima má finna fjölmörg söfn og kirkjur, m.a. glæsilega dómkirkju frá 16. öld. Í borginni er tilvalið að læra um magnaða sögu landsins og kynnast menningu Inka áður en lagt er upp í skoðunarferð um alla þá stórbrotnu áfangastaði sem finna má í Perú. Áhugaverð kennileiti má einnig finna í borginni sjálfri og er Huaca Huallamarca, fornt hof frá því fyrir tíma Inkanna, eitt af því sem ferðamenn mega ekki sleppa því að skoða. Þaðan er einnig hægt að njóta útsýnis yfir borgina.
Lifandi Lima
Næturlífið í Lima er fáu öðru líkt. Farðu á djammið með innfæddum í Barranco og þú færð Suður-Ameríska stemningu beint í æð (ekki gleyma að biðja um Pisco Sour kokteilinn á barnum). Ef þú vilt borða góðan mat á fallegum stað og dansa svo fram á nótt er tilvalið að eyða kvöldinu við sjávarborðið í Miraflores. Þar getur þú fengið úrval bragðgóðra sjávarrétta og notið útsýnisins yfir hafið. Þeir sem vilja meiri hressleika geta farið í strandpartý þar sem dansað er fram undir morgun.
Útivist og áskoranir
Þeir ferðalangar sem kjósa að reyna á sig líkamlega eða prófa eitthvað nýtt, verða heldur ekki fyrir vonbrigðum í Lima. Prófaðu svifflug (e. paragliding) frá klettunum í Miraflores og endaðu á ströndinni þar sem þú getur leigt þér surfbretti og leikið þér í öldunum fyrir utan Perú. Einnig er tilvalið að skella sér í rafting í Luna Huana sem er aðeins í tveggja tíma fjarlægð frá borginni.
Að upplifa Perú
Fyrir þá sem verða fljótt leiðir á borgarlífinu er tilvalið að leggja land undir fót og kynnast Perú. Frá Lima er aðeins tveggja tíma flug til Cuzco sem var höfuðborg Inkaveldisins. Borgin er gríðarlega vinsæll áfangastaður en þar hefja margir ferðamenn leið sína til að fara og skoða Machu Picchu. Aðrir frábærir áfangastaðir í Perú eru Titicaca vatn (link), borgin Arequipa og þjóðgarðurinn Manu. Fyrir þá sem vilja halda á vit ævintýranna getur verið gaman að klífa hin stórbrotnu Andes fjöll þar sem meira en 6000 metra háir tindarnir gnæfa yfir. Annar möguleiki væri bátsferð í gegnum frumskóginn. Þannig er hægt að ferðast niður Amazon fljótið, alla leiðina til Brasilíu. Það er erfitt að láta sér leiðast í Perú og ógleymanlegt ferðalag þitt hefst í Lima!