Sjá allar ferðir

Um sjálfboðastarf

Að gerast sjálfboðaliði getur verið bæði andlega og líkamlega krefjandi. Þú þarft að hafa áhuga og vilja til þess að aðlagast nýrri menningu. Margar spurningar koma upp hjá þeim sem hafa áhuga á sjálfboðastarfi og höfum við reynt að svara algengustu spurningunum hér.

Af hverju ætti ég að taka þátt í sjálfboðastarfi? 

Það fyrsta sem þú ættir að gera er að spyrja þig af hverju þú vilt taka þátt í sjálfboðaverkefni. Það er mjög mikilvægt að átta sig á því að þetta er ekki frí og dagarnir geta verið misjafnir hvað varðar vinnustundir og verkefni, því skipulag er ekki með sama hætti og hér heima. Það er ætlast til þess að þú vinnir og sýnir því áhuga sem þú ert að starfa við.

Að taka þátt í sjálfboðastarfi getur verið bæði andlega og líkamlega krefjandi og krefst þroska, sveigjanleika og sjálfstæðis. En sjálfboðastörf veita þér einnig tækifæri til að reyna eitthvað einstakt og öðlast ógleymanlega reynslu. Það getur verið yfirþyrmandi í fyrstu að laga sig að framandi lifnaðarháttum í erfiðu umhverfi því hlutirnir virka ekki eins og þeir gera heima, þú talar jafnvel ekki tungumálið og fólk bregst ekki við eins og þú átt von á. Þú þarft því að hafa áhuga á og vera viðbúin(n) því að kynnast nýrri menningu.

Að taka þátt í sjálfboðastarfi krefst einnig ákveðins hugrekkis því þú munt þurfa að horfast í augu við mikla fátækt og erfiðan raunveruleika.

Hversu löng eru sjálfboðaverkefnin? 

Verkefnin geta verið frá 2 vikum og upp í 30 vikur, en við mælum oftast með að dvelja í 4-16 vikur þannig að þú náir virkilega að leggja þitt af mörkum. Þegar unnið er með börnum skiptir máli að geta gefið sér a.m.k. 6-8 vikur því það getur verið erfitt fyrir börnin ef skipt er oft um sjálfboðaliða. Þegar kemur að vinnu með dýrum er ekki eins mikilvægt að dvalið sé svo lengi. Mundu að fyrsta vika sjálfboðastarfsins fer oftast í þjálfun og undirbúning og þú ert því ekki endilega að vinna í sjálfboðaverkefninu sjálfu fyrstu dagana.

Hverjir geta sótt um sjálfboðastörf?

Verkefnin eru mjög mörg og misjöfn og því ættu allir að finna eitthvað við sitt hæfi. Það mikilvægasta er alltaf að fara með opnu hugarfari og að vera sveigjanleg/ur. Flest sjálfboðaverkefnin eru rekin af heimamönnum og ekki í hagnaðarskyni. Skipulagið er oft ekki eins og við eigum að venjast og verkefnin geta breyst frá degi til dags. Þú munt jafnvel þurfa að skipta um verkefni allt eftir því hvað er að gerast í viðkomandi landi. Í þeim sjálfboðastörfum þar sem unnið er með sjúkum eða munaðarlausum börnum er mikilvægt að þú sért andlega sterk/ur, því að aðstoðin sem þú getur veitt er afar takmörkuð og lífið á þessum stöðum mun erfiðara en hérna heima.

Mikilvægt er að hafa góða enskukunnáttu, bæði til að geta átt samræður við aðra sjálfboðaliða ásamt því að geta aðstoðað við enskukennslu þegar þarf. Í flestum sjálfboðaverkefnum í Suður- og Mið-Ameríku þarft þú að hafa einhverja kunnáttu í spænsku eða portúgölsku en einnig er möguleiki að læra tungumálið bæði fyrir og á meðan á verkefninu stendur.

Mun ég hafa einhver áhrif?

Þú verður líka að gera þér grein fyrir að engin(n) getur breytt heiminum á fáum vikum! Þú ert, ásamt fjölda annarra sjálfboðaliða, hluti af stóru verkefni sem hefur raunveruleg áhrif yfir langan tíma.

Af hverju þarf ég að greiða fyrir að vinna sem sjálfboðaliði?

Það eru alltaf ákveðnir þættir sem þarf að borga fyrir, eins og:

  • Gisting
  • Fæði
  • Aðstoð á staðnum sem hægt er að nálgast á öllum tímum sólarhringsins
  • Flutningur til og frá verkefnum
  • Samræming verkefnisins
  • Framlög til verkefnisins

Hvað er innifalið í sjálfboðstarfi?

Gisting er alltaf innifalin. Það er oftast gist í sjálfboðaliðahúsi eða á hosteli í kojum, en stundum er hægt að velja að gista heima hjá fjölskyldu (heimagisting) eða gista í tveggja manna herbergi með öðrum sjálfboðaliða. Stundum er jafnvel mögulegt að borga aðeins meira og fá einkaherbergi.

Matur er oftast innifalinn, en það er misjafnt eftir verkefnum hvort allt fæði er innifalið eða aðeins ákveðnar máltíðir. Þetta er alltaf einfaldur matur og þú verður að láta okkur vita fyrirfram ef þú ert með sykursýki eða ofnæmi fyrir einhverjum matvælum.

Flutningur á milli vinnustaðar og gististaðar er í flestum tilfellum innifalinn sem og flutningur frá flugvelli að gististað.

Þar sem verkefnin eru mjög misjöfn eftir löndum er mikilvægt að þú fáir nákvæmari upplýsingar hjá ferðaráðgjafanum þínum um það verkefni sem þú ætlar að taka þátt í.

Þarf ég að búa yfir sérstakri menntun eða starfsreynslu til að taka þátt í sjálfboðaverkefni erlendis?

Nei, nánast allir geta verið góðir sjálfboðaliðar og veitt hjálparhönd þar sem þörfin er mikil. En láttu okkur endilega vita hvað þú hefur lært eða starfað við svo við getum reynt að finna sjálfboðastarf sem hentar þínum hæfileikum, reynslu og menntun.

Ætti ég að færa sjálfboðaverkefninu peninga eða gjafir?

Ef þú vilt gefa eitthvað er alltaf vel þegið að sjálfboðaliðar takið með sér föt, liti, penna eða bækur (á ensku). Við mælum einnig með að fólk bíði með að kaupa gjafir þar til á staðinn er komið. Þú sérð með eigin augum hvað vantar mest þegar þú ert komin(n) út og svo er oftast ódýrara að kaupa svona hluti á staðnum sjálfum heldur en að kaupa þá hér og ferðast með út.

Nokkrir sjálfboðaliðar KILROY hafa hafið fjáröflun fyrir verkefnunum sem þau hafa starfað við eftir að heim er komið. Vigfús Blær hóf t.d. söfnun fyrir nýjum leikskóla í Höfðaborg eftir að leikskólinn sem hann hafði sjálfur unnið í brann til grunna.

Get ég ekki bara ferðast til t.d. Asíu og fundið mér sjálfboðaverkefni sjálf/ur?

Þú getur gert það, en við mælum ekki með því. Í fyrsta lagi er alltaf áhætta að vinna í öðru landi án tilskilinna leyfa og þú getur aldrei verið viss um að fá hjálp skyldi eitthvað koma upp á. Þú getur ekki vitað hvort að verkefnið sem þú ert að vinna að er löglegt og samtökin gætu verið að stinga öllum peningunum í sinn eigin vasa. Ef þú ert óánægð/ur geturðu heldur ekki breytt um verkefni, en þú hefur alltaf þann möguleika ef þú ferð út í gegnum KILROY.

Hvar get ég unnið sjálfboðastarf?

Þú getur unnið með fólki, dýrum eða við náttúruvernd út um allan heim. Skoðaðu öll sjálfboðastörf KILROY hér.

Ertu með spurningar varðandi sjálfboðastörf?
Hafðu samband við KILROY!
Hafa samband