Fraser Island

Fraser Island
 

Fraser Island - Sandur, vatn og ævintýri

Fraser Island er rétta eyjan fyrir bakpokaferðalanga sem vilja upplifa ævintýri! Þetta er stærsta sandeyja í heimi en á henni miðri eru stöðuvötn með ferskvatni þar sem hægt er að synda án þess að þurfa að hræðast hákarla eða marglyttur. Ævintýrið hefst á jeppaferð um ströndina sem er einnig helsta akbraut eyjarinnar.

Ævintýri í sandinum

Á miðri austurströnd Ástralíu er gríðarstóra sandeyjan Fraser Island (stundum skrifað Frazer Island eða Frazier Island). Þú ættir að bæta þessari eyju á listann þinn yfir athyglisverða staði í Ástralíu. Eyjan er á heimsminjaskrá UNESCO en hún er 120 km löng og á henni eru yfir 100 stöðuvötn með ferskvatni. Sum vötnin eru brúnleit en önnur alveg tær og umhverfis þau eru hvítar sandstrendur.  

Þú getur komist að eyjunni með ferju frá Hervey Bay. Eyjan er eingöngu fyrir fjórhjóladrifin farartæki því þar eru engir malbikaðir vegir og aðalvegurinn er ströndin. Vegir sem liggja inn til landsins eru mjóir sandvegir. Keyrðu varlega og ekki of hratt því á ströndinni eru fótgangandi vegfarendur og hún er líka flugvöllur. Ef þú ert ekki reyndur ökumaður er alltaf hægt að bóka ferð fyrirfram. Þegar þú bókar pakkaferð ættir þú að velja ferð þar sem er boðið upp á góða aðstöðu. Dæmi um slíka ferð er The Beaches en þar er boðið upp á sturtur, salernisaðstöðu og eldunaraðstöðu.

Hefðbundin gisting er í tjaldi og eru flest tjaldstæðin á austurhluta eyjunnar. Það eru líka fleiri tegundir af gistimöguleikum en þú ættir að bóka þá vel fyrirfram.

Gleymdu því að synda í sjónum því sterkir straumar og hákarlar umkringja eyjuna. Þú getur séð hákarlana frá nokkrum útsýnisstöðum – einn af þeim er Indian Head.

Hundar á eyjunni

Gættu þín á dingó hundum sem lifa villtir á eyjunni. Fjöldi þeirra fer minnkandi en þeir eru enn ógn sem ferðamenn verða að gæta sín á. Það er ólöglegt að gefa þeim að borða eða ná athygli þeirra. Ef þú mætir hundi segja innfæddir að það sé langbest að bakka rólega í burtu. Verið tvö og tvö saman eða í hópum og ef þú ferðast með barn ættir þú alltaf að hafa það nærri þér.

McKenzie vatn – fallegt stöðuvatn í sandöldunum

Hið frægasta af sandölduvötnunum er Lake McKenzie en það er eitthvað sem þú ættir ekki að láta fara framhjá þér. Vatnið er í göngufjarlægð frá ströndinni, 100 metra yfir sjávarmáli og þegar þú kemur að því sérðu dásamlega sjón; kristalstært, blátt vatn, umkringt hvítum sandöldum. Vatnið er aðeins 5 metrar að dýpt og þú getur fengið þér sundsprett í því. Eftir sundið er þetta frábær staður til að hanga á fram að sólsetri.

Eli Creek

Á Seventy-Five Mile ströndinni er Eli Creek lækurinn en þaðan rennur ferskvatn frá sandölduvötnunum og út í sjó. Farðu í sundfötin og skildu eigur þínar eftir í bílnum. Gakktu upp hlíðina og þegar þú nærð góðri hæð hoppaðu þá ofan í ánna og renndu þér niður með henni. Í ánni flæða niður 80 milljón lítrar af vatni á dag – og þú!

Maheno skipsflakið

Einn af þeim stöðum sem er alltaf fullur af ferðamönnum er skipsflak sem er staðsett á austurhlið eyjunnar. Nafn þess er S.S. Maheno. Skipið var eitt sinn lúxusskip fyrir ferðamenn en í seinni heimsstyrjöldinni var það notað sem æfingaskotmark fyrir ástralska herinn. Flakið er gríðarstórt og það er bannað að klifra ofan á því.

Athugaðu að ef þú ferð á eigin vegum til eyjarinnar ættir þú að gæta að því að þú þarft leyfi fyrir farartæki þínu og leyfi til að mega tjalda á tjaldstæðinu. Þú getur keypt leyfin fyrirfram t.d. í Hervey Bay.

 

Contact