Melbourne

Brighton ströndin í Melbourne
 

Matur, vín og menning!

Í Melbourne skaltu ekki láta blekkjast af útlitinu – á bak við venjulegar dyr gæti leynst frábært veitingahús, ryðgaður hringstigi gæti leitt þig að skemmtilegum bar og óspennandi hverfi gæti innihaldið flott kaffihús, verslanir og gallerí!

Menning og hátíðir í Melbourne

Melbourne, höfuðborg Victoria fylkis er frábær áfangastaður fyrir ferðamenn sem hafa áhuga á menningu, víni, góðum mat og tónlist. Þar eru margar árlegar hátíðir af ýmsu tagi. Nokkrar af þeim stærri eru Big Day Out (janúar), Moomba Waterfestival (mars), Melbourne International Food & Wine Festival (mars), Melbourne International Film Festival (júlí/ágúst) og Melbourne Cup Carnival (nóvember). Auk þessa eru haldnir ýmsir alþjóðlegir íþróttaviðburðir í Melbourne, t.d. Australian Open (tennis, janúar), Grand Prix (formúla, mars), AFL Grand Final (ástralskur fótbolti, september) og Melbourne Cup (veðhlaupahestar, nóvember).

Mögulega besta djammið í Ástralíu?

Melbourne er oft nefnd besta borg í Ástralíu þegar kemur að því að fara út á lífið. Hvort sem það er til að fá sér latte og beyglu með osti eða skella sér á átta rétta kvöldmáltíð í heimsklassa og fá sér áströlsk vín með. Borgin hefur gríðarmikið úrval af kaffihúsum, veitingahúsum og litlum matsölustöðum sem leynast í hverri hliðargötu og á stærri svæðum. Það sama má kannski segja um aðrar borgir – en hvarvetna munu gæðin í veitingum koma þér á óvart, hvort sem það er kaffistofan handan við hornið eða nýtískulegt veitingahús. Auk alls þessa áttu eftir að hrífast enn meira af Melbourne þegar þú uppgötvar hversu mikið innfæddir elska eigin borg og það sem hún býður upp á! Finna má flotta bari og klúbba, alls staðar í Melbourne, þar sem þú getur dansað fram á rauða nótt eða fengið þér nokkra kalda og rætt ástralskar íþróttir við innfædda (góð leið til að eignast vini, en vertu viss um að þú vitir hvað þú ert að tala um!)

Týndi fjarsjóður borgarinnar

Hliðargötur Melbourne eru hinn týndi fjársjóður borgarinnar – kíktu á hina heillandi Hardware Lane (á milli Bourke og Little Bourke St) en þar eru útiveitingastaðir í röðum. Þar er hægt að eiga kósý kvöldstund, borða góðan mat og hlusta á götulistamenn flytja djass. Önnur frábær hliðargata er  Bank PI (á milli Collins og Little Collins St) þar sem þú upplifir þig sjálfsagt eins og þú hafir gengið inn til Evrópu þegar þú sérð gamaldags byggingarnar og götumyndina.

Úthverfi Melbourne

Úthverfi Melbourne heilla öll, hvert á sinn einstaka hátt. Eitt þeirra sker sig svo mikið úr að þér finnst ef til vill erfitt að trúa því að þú sért enn í sömu borginni. St Kilda (15 mínútur með sporvagni frá miðborginni) er í miklu uppáhaldi meðal bakpokaferðalanga. Þar eru gullnar sandstrendur, pálmatré, flottir barir, þekkt gistiheimili, afslappað andrúmsloft og spennandi viðburðir allt árið um kring.

Port Melbourne (5-10 mínútur með sporvagni frá miðborginni) er nýtískulegt og töff hverfi í efri klassa. Þar munt þú sjá flotta Lambourghini bíla rúlla hægt niður göturnar við hlið glansandi Porche bifreiða. Í hinu vinsæla hverfi Chapel Street í Richmond (5-10 mínútur með sporvagni frá miðborginni) er hægt að ganga á milli alþjóðlegra tískuvöruverslana og fara á litríka markaði, fá sér fullkominn cappuccino á götukaffihúsi og fylgjast með hvort einhverjir frægir gangi hjá. Nánara yfirlit yfir úthverfin og það sem þau bjóða upp á er hægt að finna hér:

Umhverfis Melbourne

Þegar þú hefur fengið nóg af stórborgarlífinu er gott að vita að rétt utan við borgarmörkin eru ferðamenn komnir í náttúruparadís Victoria. Great Ocean Road tekur ferðamenn meðfram fallegu suðvesturströndinni fram hjá kalksteinaklettum og í gegnum lítil þorp. Þessi leið er fullkomin ef þú ert með bílaleigubíl. Hinum megin við Port Philip Bay er Mornington Peninsula sem býður upp á æðislegar vínekrur, gullnar strendur og þar er hin vinsæla Philip Island.

Contact