Tahítí og Franska Pólýnesía

Strandarlíf í Tahití
 

Tahítí og Franska Pólýnesía – vellíðan í Kyrrahafinu

Tahítí er frægasta eyjan í Frönsku Pólýnesíu. Þessar eyjar hafa lengi verið lokkandi fyrir ferðamenn og bakpokaferðalanga – og þeir verða ekki sviknir! Lífið er ljúft á þessum slóðum. Þú færð þér frosinn daquiri drykk og nýtur hans á pálmaströnd, hamingjusamasta fólk eyjanna brosir til þín og sýnir frábæra gestrisni og þú munt aldrei gleyma fegurð eyjanna – sérstaklega ekki Bora Bora! Ó, elsku Bora Bora...

Ef þú hefur ekki margar vikur í fríi en langar samt að upplifa Kyrrahafsstemninguna á stuttum tíma ættir þú að fara til Tahítí og eyjanna í  kring. Eyjarnar eru í Society eyjaklasanum sem er hluti af Frönsku Pólýnesíu. Við mælum sterklega með því að þú skipuleggir mest af ferðinni áður en þú leggur af stað þar sem hún getur fljótt orðið kostnaðarsöm ef þú skipuleggur hana á staðnum. Því miður er Franska Pólýnesía dýr áfangastaður, fyrir utan Huahine.

Tahiti

Það eru þó sem betur fer, leiðir til að upplifa þessa paradís án þess að fara á hausinn: Bókaðu ódýrustu hótelin, undirbúðu eigin mat, farðu með rútu eða jafnvel á puttanum um eyjarnar og spjallaðu við vingjarnlega íbúa þeirra á vegum úti. Ef þú átt búnað til að snorkla ættir þú að taka hann með ef það er möguleiki - því það er frábært sjávarlíf í öllum lónunum en því miður dýrt að leigja búnaðinn.

Tahítí – surf, drykkir, blóm og hraunstrendur

Margir eiga auðvelt með að sjá Tahítí fyrir sér; stelpur með blómsveiga um hálsinn, pálmastrendur, hátíðlegar máltíðir og málverk eftir Gauguin. Þú munt ekki finna hvítar strendur hér heldur svartar hraunstrendur. Þú getur líka skoðað smábæi sem leynast í eldfjallalandslaginu. Skoðaðu Gauguin safnið og lærðu um líf hans á Tahítí í lok 18. aldar.

Tahítí hefur verið nefnd sem „fyrsti surf-staðurinn“ og þar eru frábærar öldur. Þetta er surf himnaríki, bæði fyrir byrjendur og atvinnumenn. Í Hava'e Pass, á Tahiti Iti, þeirri minni af tveimur eyjum Tahítí, er Teahupoo, einn hættulegasti og besti surf staður í heimi. Risaöldurnar þar eru aðeins fyrir atvinnusurfara . Góður staður til að kíkja á atvinnumennina ef þú ert byrjandi í íþróttinni.

Surf á Tahítí

Papeete

Höfuðborg Frönsku Pólýnesíu er Papeete og er hún á Tahítí. Borgin er dýr og óaðlaðandi nema þú hafir efni á því að versla, djamma og fá þér gin og tónik á snekkjunni þinni þar sem þú lítur út eins og milljónamæringur – ekki slæmt líf það...

Huahine – paradís bakpokaferðalangsins

Ef þú sækist í afslappandi strandarlíf, eins og margir bakpokaferðalangar leita að á ferð sinni til Frönsku Pólýnesíu, áttu eftir að elska Huahine. Þar hafa lúxushótelin ekki enn tekið yfir hinar fallegu sandstrendur eyjarinnar og því halda flestir ferðamenn sig í burtu. Það er ekki mikið við að vera hér, en það eru frábærar aðstæður fyrir surf, dásamlegar strendur og falleg lón sem laða að sér bakpokaferðalanga og surfara. Huahine er afslappandi og ódýr paradís.

Huahine eyjan sem hentar vel fyrir bakpokaferðalanga

Raiatea – kafaðu niður á skipsflak á Society eyjum

Raiatea er villt og ótamin eyja í Society eyjaklasanum sem gleymist oft hjá ferðamönnum. Þar eru ekki neinar almennilegar strendur en frekar hrá náttúra og stoltir íbúar sem halda vel í hefðir. Þú getur kafað niður á skipsflak en þegar þú kemur inn í það finnur þú loftbólu á 25 metra dýpi þar sem þú getur tekið af þér grímuna og fundið lyktina!

Köfun í Frönsku Pólynesíu

Bora Bora – heillandi lúxuslíf

Bora Bora er góður staður til að ljúka fríinu með stíl: Eyjan tælir þig til þess að lifa pínulítið ýktara lífi en þú gerir alla jafna, versla aðeins dýrari varning og borða á aðeins fínni veitingastöðum. Þú munt líklega njóta þess vel að eyða peningunum þínum á einni af fallegustu eyjum veraldar. Bora Bora er í sjálfri sér lítill hringlaga eyjaklasi, umkringdur kóralrifum og nokkrum óbyggðum smáeyjum. Vatnið umhverfis rifið er kristalstært og frá yfirborðinu getur þú vel séð skötur og barrakúða synda nokkrum metrum fyrir neðan yfirborðið. Ef þú vilt reyna á þig ættir þú að klífa Pahia fjall sem stendur á miðri eyjunni. Þetta er falleg en erfið ganga en þú fyllist stolti þegar þú færð að njóta útsýnisins af toppnum.

vaitape_borabora

Maupiti – hin óþekkta paradís

Maupiti er eins og lítil útgáfa af Bora Bora, eyjan er eins og hún var fyrir 40 árum. Þar eru engin stór hótel, fáir veitingastaðir og engir hraðbankar. Maupiti er paradís án alls gljáa og þar færðu svalað draumórum þínum um strendur á eyðieyjum. Hér getur þú lifað á kókoshnetum á fullkominni sandströnd. Þú getur borðað framandi fisk sem þú veiddir með skutli í túrkísbláu lóni sem þú snorklaðir í fyrr um daginn og þér leið eins og í náttúrulegu fiskabúri. Maupiti er ennþá óþekkt paradís, aðallega vegna þess hvað hún er afskekkt. Þetta er frábært tækifæri til að njóta til fulls þessarar dásamlegu hitabeltisparadísar. 

Maupiti í Frönsku Pólýnesíu

Hafa samband