San Pedro er lítill bær í norður Chile. Bærinn er staðsettur í miðri Atacama eyðimörkinni sem er einn þurrasti staður jarðarinnar. Umhverfið er magnað og möguleikarnir á ævintýrum óendanlegir! San Pedro er frábær upphafsstaður fyrir ferðalög um norðurhluta Chile.
San Pedro og nágrenni
San Pedro de Atacama er umkringdur ótrúlegu landslagi. Þar eru saltnámur, eldfjöll og bleikir flamingóar, rjúkandi hverir og heillandi bergmyndanir. Þetta litla fallega þorp er mjög vinsælt á meðal ferðamanna, og það er sko ekki að ástæðulausu. Allt í kringum San Pedro er eitthvað sem er áhugavert að sjá! Í bænum sjálfum eru nokkrir veitingastaðir, barir, gistihús, netkaffi, handverksverslanir og almenn þjónusta á borð við lögreglustöð og pósthús.
San Pedro er mjög mikilvægur bær því hann er höfuðborg fornmenningar í Chile. Þeir sem eru spenntir fyrir að skoða múmíur verða að fara í Museo Gusvao le Paige! Þetta safn er frábært fyrir þá sem vilja kynna sér menningu og sögu svæðisins, sjá múmíur og fræðast um seiðkarla. Einnig er hægt að skoða Aldea De Tulor þar sem fornleifauppgröftur tekur þif 3000 ár aftur í tímann. Rústirnar eru staðsettar nógu nálægt San Pedro til þess að hægt sé að fara þangað í hjólaferð. Þú ættir einnig að skoða hvítmálaða nýlendukirkjuna Iglesia San Pedro í miðbænum.
Atacama eyðimörkin – þú sérð stjörnur
Atacama eyðimerkursvæðið er þekkt fyrir að vera þurrasti staður jarðarinnar og fyrir marga ferðamenn er þetta einn eftirminnilegasti áfangastaðurinn í Suður Ameríku. Villt náttúran er ótrúlega heillandi og svo er eyðimörkin einn besti staður í heimi til þess að skoða stjörnurnar. Himininn hér er nánast alltaf heiður og skýr, svo stjörnufegurðin er einstök. Hér eru nokkrar stórar stjörnuathugunarstöðvar, fyrir þá sem eru áhugasamir um stjörnufræði, en sú frægasta er um 40 km frá San Pedro í Chajnantolies.
Saltslétturnar hérna, Salar de Atacama, eru ótrúleg sjón og þú mátt ekki missa af Laguna Chaxa, söltu stöðuvatni þar sem eru varpstöðvar flamingóa og fleiri framandi fugla. Vatnið er fallegast við sólarupprás þegar fuglarnir syngja til að bjóða daginn velkominn og fá sér morgunmat í gulum og rauðum geislum sólarinnar.
El Tatio hverirnir
Í u.þ.b. 80 km fjarlægð frá San Pedro er hverasvæðið El Tatio. Hér rýkur upp úr stórkostlegum sprungum og náttúrulegar hringiður myndast í jörðinni. Ekki gleyma sundfötunum þegar þú ferð að skoða svæðið því hér er hægt að baða sig í náttúrulegum laugum. Einnig er hægt að baða sig í Termas de Puritama sem eru fallegir eldfjallahverir á leiðinni til El Tatio. Þar eru nokkrar laugar og fossar með heitu vatni frá ánni Puritama sem rennur úr gljúfri. Fegurðin hér er ómótstæðileg!
Valle de la Luna - Dalur mánans
Ein skemmtilegasta ferðin sem hægt er að fara í frá San Pedro er til hins einkennilega Valle de la Luna sem er aðeins 13 km frá bænum. Hér sýnir náttúran sitt skrýtnasta og stórkostlegasta eðli. Dalurinn samanstendur af fjölda undarlegra klettamyndanna og hrífandi eyðimerkurlandslagi. Eins og nafnið gefur til kynna er dalurinn sérstaklega heillandi í tunglskininu.
Hátíðir í San Pedro
Það eru margar skemmtilegar hátíðir í San Pedro. Fiesta de San Pedro y San Pablo er sú stærsta og er haldin 29. júní. Upplifðu þjóðdansa, rodeo og dularfulla styttuskrúðgöngu. Önnur hátíð er Fiesta de Nuestra Señora de la Candelaria sem haldin er snemma í febrúar en hún er trúarleg danshátíð.
Hvenær er best að fara til San Pedro?
Það er eiginlega hægt að fara til Chile hvenær ársins sem er, en mesta ferðamannatímabilið er frá desember til mars.
Að ferðast um San Pedro
San Pedro er svo lítill bær að það er auðvelt að ganga á milli staða. Það er líka góð hugmynd að leigja fjallahjól! Í bænum eru nokkrar ferðaskrifstofur þar sem hægt er að bóka ferðir að nálægum áfangastöðum. Hægt er að komast með rútu til Argentínu og Bólivíu og til annarra áfangastaða í Chile.