Boston

Boston er mjög lífleg og skemmtileg borg
 

Boston: Bandaríkin og Evrópa mætast

Boston er einkum þekkt fyrir hafnabolta, bjór og blómlegt háskólalíf. Það er hart í ári hjá íbúum Boston ef hið ástsæla hafnaboltalið þeirra, Red Sox, spilar ekki úrslitaleik heimsmeistaramótsins í hafnabolta sem fer fram í október ár hvert. Þegar það hins vegar tekst er erfitt að toppa þá upplifun að koma sér vel fyrir inni á kósý pöbb, fá sér nokkra bjóra með stuðningsmönnum og fagna þessum íþróttahetjum borgarinnar sem klæðast auðvitað rauðum sokkum, eins og nafnið gefur til kynna. Annar möguleiki til að upplifa hafnaboltastemninguna er að sjá liðið með eigin augum á Fenway Park, þar sem liðið hefur spilað heimaleiki sína frá árinu 1912.

Boston hefur þó upp á miklu meira að bjóða en bjór og sveitta íþróttamenn… og reyndar nánast fullkomna andstæðu. Borgin hefur vitsmunalega, fræðilega og bókmenntalega hlið. Nokkrir frægir rithöfundar koma frá Boston, t.d. Edgar Allan Poe. Hinn heimsfrægi Harvard háskóli er staðsettur í Cambridge, úthverfi Boston og ættu allir ferðalangar að ganga um sögulegt og fagurt háskólasvæðið, upplifa stemninguna og skoða íkorna og gáfumenni.

Freedom Trail: Blóðug spor í átt að frelsi

Í gegnum stóran hluta af Boston liggur rauð lína. Þessi lína er táknræn fyrir blóðið sem rann í þessum norðausturhluta landsins í borgarastyrjöld Bandaríkjanna (e. American War of Independence eða Civil War). Ef þú fylgir þessari línu munt þú finna nokkur af mikilvægustu minnismerkjum og kennileitum sem tengjast styrjöldinni og þeim atburðum sem leiddu til hennar í kringum árið 1770. Þessi áhugaverða gönguleið í gegnum Boston er kölluð Frelsisstígurinn (e. Freedom Trail) og er frábær leið til að minnast þessa mikilvæga hluta af sögu Bandaríkjanna og fá innsýn í það hvernig Bandaríkjamenn líta á sjálfa sig sem þjóð. Heimsókn til Boston gefur þér innsýn í aðstæðurnar og atburðina sem leiddu að stríðinu, núna mörgum árum seinna.

Andstæðir pólar

Upphafspunktur þessarar fyrrnefndu rauðu línu og Frelsisstígsins er Boston Common – fallegur garður í hjarta borgarinnar. Sú staðreynd að þessi skemmtilegi garður innihaldi eitthvað jafn dramatískt og Frelsisstíginn er nokkuð einkennandi fyrir heildarmynd borgarinnar. Borgin er að mörgu leyti staður þar sem andstæður mætast: Þar getur þú fundið kósý hverfi með einkennandi múrsteinsbyggingum við hlið glansandi háhýsa í fjármálahverfinu. Þú rekst á indælar verslunargötur – hægt er að mæla eindregið með Newbury Street – en einnig minna sum hverfi á breskar hafnarborgir, þar sem stíllinn er hrár og verksmiðjukenndur. Sumir borgarhlutar einkennast af elítu og menntaþokka en aðrir af meiri verkamannastíl sem talinn er tengjast írskum bakgrunni borgarinnar. Boston er staðsett á ströndinni við Atlantshafið og síðan á 19. öld hafa fjölmargir innflytjendur frá Evrópu, sér í lagi Írlandi og Ítalíu, sett mark sitt á borgina. Því má finna í borginni marga kósý írska bari og einnig eru góðir ítalskir veitingastaðir víða. Sérstaklega heillandi er Hanover Street en þar má snæða frábæran ítalskan mat.

Hvalirnir eru að koma

Auðvitað er einnig hægt að upplifa náttúrulíf í og umhverfis Boston. Staðsetning borgarinnar við Atlantshafið gerir hana að góðum stað til að leggja upp í ferðir um sandöldur og strendur á Cape Cod eða fallegu eyjarnar Nantucket og Martha’s Vineyard. Að ógleymdum spennandi hvalaskoðunarferðum sem fara daglega frá höfninni á tímabilinu apríl – október. Í þessum ferðum er nánast tryggt að þú kemst í návígi við einn af þeim risastóru hvölum sem halda til á svæðinu frá vori og fram á haust. 

Hafa samband